ئێواره‌ی ئه‌مڕۆ له‌هۆڵی بۆنه‌كانی شاری كه‌لار له‌لایه‌ن رێكخراوی خێرحوازی گه‌رمیان به‌ سپۆنسه‌ری كۆمپانیای (ئاسیا سێل)، ئاهه‌نگێكی بووك گواستنه‌وه‌ به‌ كۆمه‌ڵ بۆ (30) كوڕ و كچی ده‌ڤه‌ری گه‌رمیان ساز كرا.

له‌مباره‌وه‌ سه‌رۆكی رێكخراوی خێرخوازی گه‌رمیان (جه‌لال هۆرینێ) تایبه‌ت به‌ په‌یامنێری راگه‌یاند، ئه‌مڕۆ له‌لایه‌ن رێكخراوه‌كه‌مانه‌وه‌ به‌ سپۆنسه‌ری كۆمپانیای ئاسیا سێل هه‌ڵساین به‌سازدانی ئاهه‌نگێكی بووك گواستنه‌وه‌ به‌كۆمه‌ڵ بۆ (30) كوڕو كچی كه‌م ده‌رامه‌ت و بنه‌ماڵه‌ی شه‌هید و ئه‌نفاڵی سنوری گه‌رمیان كه‌ سه‌رجه‌م پێداویستییه‌كانی ناو ماڵیان له‌لایه‌ن كۆمپانیای ئاسیا سێله‌وه‌ بۆ دابین كرابوو له‌گه‌ڵ بڕی (300) دۆلار بۆ هه‌ر بووك و زاوایه‌ك له‌لایه‌ن خانمی یه‌كه‌می عێراقه‌وه‌ (هیرۆ ئیبراهیم ئه‌حمه‌د).

هه‌روه‌ها گوتی : ئه‌م بووك زاواویانه‌ له‌لایه‌ن لیژنه‌یه‌كی تایبه‌ته‌وه‌ هه‌ڵبژێردراون و ده‌بێت به‌شداربوان كه‌م ده‌رامه‌ت و هه‌ژار بن و هه‌روه‌ها یه‌كه‌مجاریان بێت بچنه‌ ناو پرۆسه‌ی هاوسه‌ركرگیرییه‌وه‌.

جێی ئاماژه‌ بۆ كردنه‌ رێكخراوی خێرخوازی گه‌رمیان تاوه‌كو ئێستا چوار جار ئاهه‌نگی بووك گواستنه‌وه‌ی به‌كۆمه‌ڵی ئه‌نجام داوه‌ و تێیدا (101) بووك و زاوا به‌شداریان تێدا كردووه